शिरूर, प्रतिनिधी : सुदर्शन दरेकर पुण्यातील हडपसर येथे घडलेल्या विषारी दारू प्रकरणानंतर राज्यभरात हातभट्टी दारू निर्मिती व विक्रीविरोधात पोलिसांनी मोहीम तीव्र केली आहे. त्याचाच एक भाग म्हणून रांजणगाव एमआयडीसी पोलिसांनी शिरूर तालुक्यातील निमगाव भोगी परिसरात मोठी कारवाई करत गावठी हातभट्टी दारूचा अड्डा उद्ध्वस्त केला.
पोलिसांनी केलेल्या छाप्यात सुमारे १ लाख ५ हजार रुपयांचा मुद्देमाल जप्त करण्यात आला. यामध्ये हातभट्टी दारू तयार करण्यासाठी वापरले जाणारे सुमारे ५०० लिटर कच्चे रसायन, २०० लिटर तयार गावठी दारू तसेच एक अल्टो कार यांचा समावेश आहे.
या प्रकरणी निलेश गुलाब लोंढे (वय ३४, रा. निमगाव भोगी, ता. शिरूर) याला अटक करण्यात आली असून न्यायालयाने त्याला ३ जून २०२६ पर्यंत पोलीस कोठडी सुनावली आहे. आरोपीविरुद्ध यापूर्वीही महाराष्ट्र दारूबंदी कायद्यांतर्गत गुन्हे दाखल असल्याची माहिती पोलिसांनी दिली.
विशेष म्हणजे घटनास्थळी आढळून आलेले हातभट्टी दारू निर्मितीसाठीचे रसायन व साहित्य दोन जेसीबी मशीनच्या सहाय्याने जागीच नष्ट करण्यात आले.
ही कारवाई रांजणगाव एमआयडीसी पोलीस स्टेशनचे पोलीस निरीक्षक महादेव वाघमोडे यांच्या मार्गदर्शनाखाली करण्यात आली.
हडपसरमधील विषारी दारू दुर्घटनेच्या पार्श्वभूमीवर अवैध दारू व्यवसायाविरोधात पोलिसांनी कठोर भूमिका घेतल्याचे या कारवाईतून स्पष्ट झाले आहे.
Users Today : 410
Users Yesterday : 58