शिरूर नगरपालिका निवडणुकीत सर्वपक्षीय उमेदवारांची तिकिटासाठी जोरदार धावपळ…

शिरूर प्रतिनिधी-
“तुमची संगतच तुमचं आयुष्य घडवत असते,” असं म्हटलं जातं आणि हेच सूत्र सध्या शिरूरच्या राजकारणातही दिसून येत आहे. आगामी शिरूर नगरपरिषद निवडणुका जाहीर झाल्यामुळे शहरात राजकीय हालचालींना वेग आला आहे. उमेदवारांच्या नावापेक्षा कोणत्या आघाडीची उमेदवारी मिळते, याकडेच सगळ्यांचे लक्ष लागलेले आहे.

गेल्या काही वर्षांत शिरूर शहराच्या विकासाच्या वाटचालीत “शिरूर शहर विकास आघाडी” ने आपली मजबूत पकड निर्माण केली आहे. शहरातील पाणीपुरवठा, रस्ते, आरोग्य आणि स्वच्छता यांसारख्या विषयांवर या आघाडीने केलेल्या कामांचा परिणाम जनतेपर्यंत पोहोचला आहे. त्यामुळे आजही नागरिकांमध्ये शहर विकास आघाडीबद्दलचा विश्वास कायम आहे.

त्यामुळेच या निवडणुकीतही — कोणत्या पक्षाचे तिकीट मिळतंय यापेक्षा, शिरूर शहर विकास आघाडीचा ठसा उमेदवारीवर आहे का? हा प्रश्न अधिक महत्त्वाचा ठरला आहे. सर्वपक्षीय उमेदवारांची लॉबिंग सुरू असताना दिसते आहे.

शहरात सध्या विविध राजकीय पक्षांमधील इच्छुक उमेदवार “शिरूर शहर विकास आघाडी”ची उमेदवारी मिळवण्यासाठी सक्रिय झाले दिसत आहेत . सर्वपक्षीय इच्छुकांनी एकच ध्येय ठेवलं आहे — धारीवाल यांचा विश्वास मिळवणे.

कारण राजकारणात “जिंकणाऱ्यांच्या संगतीत राहिलात तर तुम्हीही आपोआप जिंकता” हे समीकरण प्रत्येकाला उमगलेलं आहे. त्यामुळे आघाडीच्या जवळीकतेसाठी प्रयत्न तीव्र केलेले दिसत आहेत.

प्रकाश धारीवाल — शहराच्या राजकारणाचा केंद्रबिंदू
शिरूरच्या राजकीय व व्यापारी क्षेत्रात उद्योगपती प्रकाश धारीवाल यांचे नाव आज प्रभावी नेतृत्व म्हणून घेतले जाते. त्यांचा शब्द, त्यांचा निर्णय आणि त्यांच्या मार्गदर्शनावर अनेक राजकीय समीकरणं ठरतात.

धारीवाल हे फक्त उद्योगपती नसून शहराच्या सामाजिक व शैक्षणिक क्षेत्रातही त्यांनी महत्त्वाची कामगिरी केली आहे. त्यामुळे सर्वपक्षीय कार्यकर्ते आणि संभाव्य उमेदवार त्यांना “नेते” मानतात. त्यांचा आशीर्वाद मिळणं म्हणजे निवडणुकीच्या स्पर्धेत आघाडी मिळवणं, अशी धारणा शहरात प्रबळ आहे.

आगामी निवडणूक

२ डिसेंबर रोजी होणाऱ्या मतदानाच्या पार्श्वभूमीवर शिरूर नगरपरिषद निवडणूक ही फक्त सत्ता बदलाची लढत नाही, तर शहरातील विश्वास, विकास आणि नेतृत्वाच्या परीक्षेची लढत आहे.

शहर विकास आघाडीचं वर्चस्व कायम राहतं का, की काही नवीन समीकरणं उभी राहतात — हे पाहणं उत्सुकतेचं ठरणार आहे.

आजच्या राजकीय वातावरणात, “संगती” हा घटक जसा माणसाचं आयुष्य घडवतो, तसाच तो राजकारणात यशाचं गणित ठरवतो. शिरूर विकास आघाडीची साथ आणि प्रकाश धारीवाल यांचं मार्गदर्शन — कोणाचं भवितव्य उजळवतं याकडे सर्वांचे लक्ष लागून राहिलेल आहे.